فلاح علي كرسي العرش

2006/03/25

هو وهي

هي:شفافة
هو:ما عليه الا ان يسكب نفسه فيها
تسمحي-
اسمح بايه-
انسكب-
هاهاهاهاهاه-

2006/03/15

عفريت


دايما مستخبي في جيبي الشمال بيلخبط لي كل حاجه
ويطلع في اي وقت بشرط مايكونش الوقت المناسب
فاخبطه علي دماغه واغطيه بمنديل بنفس لون الكارافته
.يمسك دقنه ويهزلي دماغه
لما النور ينطفي يبقي ده الوقت المناسب عشان اتقي شره واصالحه
اتأكد ان مفيش حد واخد باله اشيل المنديل فينط من جيبي
يفك لي الكارافته
يبص لكل اللي قاعدين ويطلع لسانه
يوقع العدسات للأمورة اللي جنبي
يبوظ الجيل اللي في شعر اخينا اللي في الركن
ويبص لي ويلاعب حواجبه
اجري وراه اتكعبل في الكارافته
ينط في السقف انط وراه... هوب
مسكتك............
ايه ده.. ايه الناس دول كلهم
النور جه........
مش انا......
.....والله ما انا.....

2006/03/11

زمان ودلوقتي

زمان كان الناس ميقدروش يعيشوا من غير تلاته
,فتوه يدافع عنهم ويدفعوا له,حرامي يسرقهم ويجري منهم
ولي يمسحوا فيه ذنوبهم
دلوقتي الناس ميقدروش يعيشوا من غير نفس التلاته
فتوه يضربهم ويدفعوا له حرامي يسرقهم ويجرّهم وراه
."ولي يلمّع لهم ذنوبهم"ب50 قرش ولمّع

2006/03/01

كدبه

سمعتها منكم اول ما اتولدت
وقولتها اول ما اتعلمت اتكلم واول مرة زوّغت فيها من المدرسة
وقلتها كتير لما كنت باكل لبان بعد ما اشرب سجاير
وقلتها لأول بنت مشيت معاها
بس مقدرتش اقولها للبنت الوحيدة اللي حبيتها
وفرحت اوي لما قلتها لنفسي بعد ما سابتني
كدبة مستعد اقولها لأي حد فيكم
.بس بشرط ميقولش عليّ كدّاب