قص ولزق

كل حته فيه متفتفته ستين فتفوته مفيش واحدة شبه التانية
مع اول صرخة بيبعتر كل الفتافيت ميبقاش معاه غير حته واحدة يمكن تكون هي اسمه
وبالصدفة بيلاقي حته تانيه في ايد امه لما بتطبطب عليه
وواحدة تالته بيلاقيها في الهوا وابوه بيهشكه
ويبتدي رحلة التجميع لحد ما يفتكر انه جمع كل الاجزاء اللي بعترها زمان
ويعجبه شكله لمدة لحظة من بعدها يكتشف انه في حتت مش محطوطة في مكانها
يرتبها من جديد تنقص فتفوته يدور من تاني
يلاقيها مع بنت لسه ماحبتهوش بس دايما بتتخانق معاه علي نفس الفتفوته
بعد سنين بيوصلوا لحل يلزقوا نفسهم في بعض ويبتدوا الرحلة من جديد
.لحد ما واحد منهم يلاقي الحته اللي ناقصاه